Mentally ill man takes over primary school, attacks pupils, teachers Ekiti

When betta security no dey some important places, anything fit just happen as many tins go dey go wrong.

For AUD Primary School wey dey Irona, Ado-Ekiti, one mad man don chuk d lives of both the teachers and pupils wey dey there inside danger as im come turn the school to im personal property. This man don dey stay for the school without rent. The guy don hijack over 10 classrooms come scatter the place with dirty. Apart from this mad man, e get other people wey dey stay dere o; according to the chuen chuen wey we get, even people wey dey steal, rape and smoke igbo , dey stay for there.

Because of these things wey dey happen, many parents come dey carry their children commot from the kin school as dem too dey fear for wetin fit happen. According to wetin the head teacher, Mrs Taibat Yusuf, tell newsmen, na these criminals wey collabo with the mad man, na im pursue people from the school and na im come make learning very hard for the people wey remain. She say dem dey ask the state government make dem help dem commot this mad man from their school because anytime children come school, im go dey stone dem and their teachers, come dey pursue dem. She still talk say d place don dey give accommodation to criminals wey dey the area, say make government help them rebuild their fence wey don collapse.

One person wey bn finish from the school wey im name be Alhaji Olohunkemi Tajudeen Ogunjobi con raise voice say make government come rebuild the school. Im say when im bn dey d school, dem reach 150 but now dem no even reach 30 wey dey the school. Na im e come talk say make the Police and Civil Defence officers come arrest the mad man, say make the government help dem bring day guard and night guard wey be vigilante, make dem dey protect the school. Im still talk say make dem scatter all the classes wey don dey spoil so dey go fit use am for playing ground or renting area wey the school go fit use make money.