For Ondo state some
area boys beat one 50- years old bus driver, wey im name be Akeem Olanipekun,
sotey im come die. This gbese bn happen for Imo quarters for Ondo state this
weekend wey just pass.
According to the chuen
chuen wey we get, these area boys beat dis man with charm wey dem hold. People
wey see wetin happen talk say the man just follow im friend wey get renting
business as dem go set canopy for one ceremony wey wan happen. The person talk
say as dem dey set the canopy, na so the area boys gather dem dey ask for
money, wey dem dey call “owo ile” before dem go set the canopy.
From there na im hot
quarrel burst between Akeem and these area boys. These area boys come commot go
bring charm, use am take beat the man because he no pay them “Owo Ile”. After
dem beat the man finish, d man come dey shake till he come finally die.
As tins be now, d whole
town dey shake because of this matter. People dey fear say d family of d man
fit wan revenge for wetin these area boys do the man.
People wey dey when e happen talk say as them
beat d man finish, na im dem come tear race commot from the area. The oga of
Police wey dey that area, Razak Rauf, talk say true true this tin happen. He
come talk say dem go find these area boys come arrest them join. As e be so, dey
don carry Akeem dead body go mortuary wey dey Ondo State Specialist Hospital
Ikare Akoko
No comments:
Post a Comment